Monday

أخبار سارة

الحبس سنة للمتهم في واقعة التحرش الجنسي في المهندسين

قضت محكمة جنح العجوزة بمعاقبة الطالب إسلام مجدى (19 سنة) بالحبس سنة مع الشغل والنفاذ في أولي جلسات محاكمته لاتهامه في واقعة التحرش الجنسي بالفتيات بشارع جامعة الدول العربية بالمهندسين‏

______________


أول امرأة تشغل منصب عمدة في احدى قرى الصعيد

إيفا هابيل كيرلس (53 عاما)هي أول امرأة مصرية مسيحية تشغل منصب العمدة في قريتها "كمبوها بحري" التابعة لمحافظة اسيوط


__________________


مش قادرة أخبي فرحتي بالخبرين دول.. واتمنى من كل قلبي ان دي تكون خطوة أولى لمزيد من التقدم في مجال حقوق المرأة في مصر

ألف مبروك لإيفا.. واتمنى لها كل التوفيق والنجاح في عملها.. ويا ريت ده يرفع سقف الطموح لبناتنا اللي في قرى ونجوع مصر
سنة 1998 كان عندنا أول امرأة تشغل منصب شيخ البلد في احدى قرى محافظة القليوبية، وهي سهير اسماعيل.. ومنذ ذلك الحين لم تشغل المرأة في الريف المصري أي منصب قيادي.. يا ريت يجي الفرج على ايدين إيفا ومانستناش 10 سنين كمان عشان نشوف عمدة تانية وتالتة وعاشرة.. وعايزين نشوف امرأة في منصب المحافظ كمان.. وبعدين رئيسة وزارة.. معتقدش هأعيش لغاية ما اشوفها في منصب رئيس الجمهورية، لأن كل يمتنعون عن هذا المنصب في بلادنا العربية

***

ولو اني مستغربة ان حادثة تحرش جماعي تصفصف على متهم واحد!! والتاني حدث عمره 17 سنة اتحول لمحكمة الاحداث.. لكن أهو الموضوع ما مرش مرور الكرام زي العيد اللي قبله.. ولا حد قدر ينكر وقوع احداث تحرش جماعي زي اللي حصل قبل كدا.. اتمنى ان العيد الجاي يكون عيد بجد ولا يعكره مثل هذه الاحداث المشينة والوضيعة. يا ريت شوارعنا ترجع آمنة زي زمان

5 comments:

Alkomi said...

فانتا

ايفا عندها 39 سنة

و بعدين هي و ابوها و عيلتها من اقطاب الحزب و اقباط و قريتها كلها اقباط

يعني الموضوع ممكن اوي يكون شو و منظرة اكتر منه تفتح عقول

مش عايز انكد عليكي بس اختي متجوزة في منفلوط و عارف بقولك ايه

صدقيني استني شويةوو هنشوف هل الدنيا اتغيرت ولا بيلحسوا دماغنا

على فكرة دي كانت في مؤتمر الحزن الواطي اللي فات و قالت انها مرشحة لمنصب العمدة

عموما نستنى و نشوف يافانتا

Desert cat said...

سعادتى بالخبر الاول لا تقل عن سعادتى بالخبر التانى
تضاهيم سعادتى باستلام امل لدفتر المأذونه
:)
مبروك علينا

Fantasia said...

الاستاذ العزيز محمد الكومي

يا سيدي حتى لو كان شو، هو احنا لاقيين؟

كويس ان فيه اي خطوة لقدام

وعلى رأيك، نستنى ونشوف

نورتني

Fantasia said...

العزيزة قطة الصحراء

يا رب كتر افراحنا وعلى قد نيتنا ادينا

يا ريت بس العجلة تمشي بسرعة وماتقفش عند كدا. أصل احنا نحب مثلا نحط وزيرة واحدة ست لزوم المنظر

تحياتي يا قمر

فيلسوف said...

في المجتمع العربي للاسف لا يضعون المرأه بسبب الكفائه إلا ما ندر


فأغلبهم يكونوا لرفع العتب وباننا نعين النساء كقياديات في الدوله

انا برأيي اهم شيء هي الكفائه
هذا الذي يجب ان نبحث عنه


اما بخصوص هذا الولد الخبر محزن و مفرح بنفس الوقت

مفرح لانه اخذ جزاء عمله

وان يكون عبره لمن اعتبر

اما المحزن فيه انه الوحيد اللي اتمسك مع ابو 17 سنه

الباقين هل ذهبوا مع الريح ؟!!!!و

يجب ان نقف وقفه جاده امام الانحلال الاخلاقي الذي يحدث في المجتمع