Tuesday

يا ست البيت يا مصرية


عمرك تخيلتي نفسك، بعد كل اﻷيام اللي سهرتيها وقعدتي من غير نوم لما خلاص كنتي علي وشك يجيلك إنهيار عصبي عشان تنجحي ف الإمتحانات كل سنة.. بعد ما ضهرك انحنى علي مكتبك عشان تذاكري وتجيبي مجموع عالي ف الثانوية العامة.. بعد ما أخيرا حجزتي مكان ليكي ف جامعة محترمة .. بعد ما قضيتي السنين بتعافري مع المرور والزحمة عشان تروحي محضراتك ف المعاد .. بعد ما صارعتي الدكاترة المتوحشين والكتب اللي هتفرقع من كتر ورقها .. بعد ما أخيرا مسكتي شهادتك بين إيديكي .. عمرك تخيلتي نفسك تكوني ست بيت؟


متقوليش كلام زي: "لا، مستحيل .. أنا مش مجنونة عشان أعمل كدا .. أنا عايزة أشتغل وأي حد يقرر يتجوزني لازم يفهم كدا" ، عشان كل البنات اللي إنتهت بيهم العملية ف البيت مكانش دا حلم طفولتهم. ولو سمحتي متقوليش: "أنا أستحق شوية راحة بعد كل المعاناة دي" عشان إنتي مكنتيش بتتعذبي إنتي كنتي بتتعلمي .. ولو إنتي مش مقدرة علمك ده, يبقي إنتي متعلمتيش حاجة. وأرجوكي متقوليليش: "ليه ﻷ؟ لو جوزي غني ونقدر نعيش مستريحين بمرتبه يبقي ليه أشتغل؟" عشان الناس مش بتشتغل بس عشان الفلوس .. دا حق المجتمع إنه يستفاد من قدراتك ولإنه حاجة نفسية مهمة عشان تحققي ذاتك.


سؤال بيتسأل كتير ف الفترة اللي فاتت: "فين كل البناتاللي كانوا طالبات متفوقات؟ فين البنات أوائل الثانوية العامة؟" حقيقة إن معظم الطلبة المتفوقين واﻷوائل ف الكام سنة اللي فاتوا كانوا بنات خلت ناس كتير تسأل عن مصير العباقرة دول. كل الطالبات دول اللي صورهم ملت الجرايد، اللي إتعمل معاهم برامج ف التليفزيون، اللي ملوا الدنيا بأمالهم وأحلامهم للمستقبل .. كلهم بعد كدا إختفوا.


في تحقيق عملته جريدة مستقلة وجدوا إن حوالي 80% من البنات دول انتهى بيهم الحال دلوقتي انهم اصبحوا ستات بيوت .. وإن الباقيين شغالين ف وظايف روتينية مفيهاش أي تحدي ومش محتاجة أي موهبة خاصة، ودا عشان الوظايف دي مواعيدها مناسبة ليهم ك "أمهات عاملات"! دا المكان الي بينتهي فيه البنات المميزين ف البلد دي. ف بلد ف العالم التالت المفروض إنها محتاجة لكل عقل عشان يطلعها من الخندق اللي محشورة فيه. ف بلد نص سكانها أميين. ف بلد بتحارب من أجل التطور عشان تهرب من كماشة الفقر. ف بلد مش بتصنع أي صناعات ثقيلة أو أدوية أو أي أدوات تكنولوجية. ف بلد بتهاجمها الأمراض. ف بلد بتغرق ف ظلام التعصب والجهل الديني.


ف رأيي البنات دول نوعين:
متخاذلات .. هما ببساطة مش محترمين المعرفة ولا الموهبة اللي عندهم. مش مهتمين بمستقبل بلدهم. مش عايزين يكون ليهم أي دور ف تغيير مجتمعهم. مش أذكيا بجد, انما كانوا دحاحين. هما بنات معندهمش أي شخصية أو أهداف، هما بس جابوا درجات عالية عشان يسعدوا أهاليهم وعشان يفتخروا بيها. بلدنا بتضيع فلوسها عشان تعلم البنات دول وتوفرلهمفرص للنجاح عشان ف اﻷخر وبعد التخرج يجرجوا ألسنتهم ويقولوا: "خلاص، اللعبة إنتهت، إحنا هنقعد ف البيت عشان لقينا العرسان المثاليين اللي مصدقين إننا أذكيا ومتفوقات .


منومات مغناطيسيا .. المجتمع وأزواجهم خدعوهم وأقنعوهم إن دورهم كزوجات وأمهات كفاية. سمعوها وبيسمعوها دايما .. إن اﻷم الكويسة بتخدم مجتمعها لما تهتم بالجيل الجديد. يافرحتي بالجيل الجديد! .. ومش مهم لو الجيل الجديد ملقاش تعليم محترم .. مش مهم لو الجيل الجديد عاني من الفقر والمرض .. مش مهم لو الجيل الجديد ملقيوش شغل .. مش مهم لو حسوا بالعار إنهم إتولدوا ف البلد دي .. مش مهم لو إكتشفوا إنه مستحيل يحققوا أي أحلام .. مش مهم. المهم إننا نجيب الجيل الجديد وخلاص .. نسيبهم يبقوا زي ما هما عايزين بقى .. نسيبهم يشحتوا ف الشوارع .. نسيبهم يتعاطوا مخدرات .. نسيبهم يهاجروا من البلد أو يموتوا ف مركب عشان يوصلوا أوربا .. نسيبهم ينتحروا لما يفقدوا اﻷمل .. نسيبهم يبقوا إرهابيين .. نسيبهم يمشوا ف الشوارع من غير هدف عشان يضيعوا الوقت .. نسيبهم يتحرشوا بالبنات ف المواصلات العامة عشان معندهمش أمل إنهم هيقدروا يتجوزوا ف يوم من اﻷيام .. نسيبهم ياخدوا دورهم ف إنهم يجيبوا جيل جديد بائس أخر .. مش هي دي الحياة؟


سواء مستسلمين أو منومين مغناطيسيا، البنات دي، اللي هما ستات دلوقتي، بيتحولوا إلي ستات بيوت بائسات. بيقضوها حياتهم كلها وهما بيحاولوا يسعدوا أهلهم وبعدين أزواجهم .. معظمهم مش مدركين إن ملهمش حياة خاصة بيهم. هما دايما الي بياكلوا الكحك المحروق؛ هما اللي دايما بييجوا ف اﻷخر. متعلموش يقدروا نفسهم أو عقولهم، عشان كدا مش بيقدروا يقدروا الدور الإيجابي للمجتمع. بيعيشوا ف قوقعة صغيرة, اللي هي العيلة, من غير ما يهتموا يعرفوا إيه اللي برة. بينفذوا اللي بيتقالهم، هما القطط الصغيرة المطيعة ف البيت. بينتهي بيهم الحال كأمهات وحيدات ودا عشان أزواجهم مش هيفكروا يساعدوهم لا ف البيت ولا مع اﻷطفال. يعني هي بتعمل إيه وهي قاعدة طول اليوم ف البيت؟ هي دي شغلتها .. خليها تتصرف ف كل حاجة. ولو حاجة مشيت غلط يبقي هي بس اللي تتلام. هي موجودة عشان اﻷطفال 24 ساعة 7 أيام ف الاسبوع .. فلازم اﻷطفال يجيبوا أعلي درجات ف المدرسة .. لازم يكونوا محترمين ومؤدبين لما بابا يكون ف البيت .. لو مرة عملوا حاجة غلط يبقي دي غلطتها. اﻷب ف الحالة دي بيكون البنك. هو برة البيت بيعمل فلوس عشان اللي معتمدين عليه ف البيت. كونه البنك اللي بيصرف معناه إن من حقه يلاقي كل حاجة زي ما هو عايزها، ومش مهم إذاي، دا مش شغله. هو بس بيصرف ومش مهم خالص يعرف أي تفاصيل .. مش بيهتم إنتي قعدتي كام ساعة ف المطبخ عشان تحضريله اﻷكل .. هو بس مهتم إن اﻷكل طعمه مش حلو. كل حاجة لازم تمشي تمام . .إنتي موجودة عشان كدا .. هو دفع كل الفلوس بتاعت البقالة عشان ياكل أكلة تمام .. وإنتي اللي بوظتيها.


ستات البيوت البائسات دول هيكبروا مرهقين وحاسين بالمرارة .. وإحساسهم دا هينعكس علي كل حاجة حتي لو كانوا بيبذلوا أقصي ما عندهم عشان يرضوا الكل. السبب إنهم بينسوا يرضوا أهم شخص: نفسهم. مع مرور السنين، بيبقوا تخان، مبهدلين, عيانين، سطحيين, عصبيين، بيضمحلوا ومش بيقدروا يحسوا بالسعادة، مش بيقدروا يحسوا بقيمة الحياة، مش بيقدروا يتواصلوا مع أطفالهم، مش بيقدروا يسعدوا أزواجهم ولا بيقدروا يمارسوا الحب، مش بيقدروا يمارسوا هواية أو يكون ليهم إهتمامات بجد. بيضيعوا وسط تفاصيل كل يوم وبيبقي أفضل وقت بالنسبالهم هو وقت الفرجة ع التليفزيون. أجازة أخر اﻷسبوع بتبقي كابوس، عشان الزوج موجود وعمال ينقد ويتكلم علي كل حاجة طول اليوم. خروجة للنادي بتتحول فيها لحارس للولاد. بتخرج عشانهم وهي مش بتستمتع بأي حاجة. أجازة الصيف بتبقى هم اكبر: بتشيل هم توضيب الشنط، تنضيف الشاليه، أخد لعب وساندوتشات الولاد للشط، بتراقبهم ف المية وهما بيلعبوا مع باباهم (إيه؟ انتوا عايزينها تلبس مايوه وتنزل الميه معاهم؟ خليها بس تتفرج أو تقرالها مجلة فضايح)، بعد كدا تحمي الولاد، تحضر اﻷكل للسباحين الجعانين، وتحضر وجبات خفيفة للعشا، تغسل المايوهات والفوط، وهكذا. مش بتستمتع بدقيقة واحدة ف كل الوقت دا، هي بس موجودة عشان تخليهم يستمتعوا، هي بس موجودة عشان يتبسطوا ف الوقت اللي هي مربوطة بكل التفاصيل اللي بتضيع وبتستهلك حياتها.


بصوا حواليكوا .. هتلاقوا الزوجات البائسات دول ف كل مكان .. هما الصورة المثالية للمرأة المصرية .. هما اللي بيتوجه ليهم كل الإنتقادات في حين إنهم بيضحوا بكل شئ في سبيل الناس اللي بيحبوهم. أختك ممكن تكون واحدة منهم لو ما أخدتش بالك منها وهي بتتحول لمتخاذلة أو وهي بتتنيم مغناطيسيا. مامتك ممكن تكون واحدة منهم وهتلاقيك بتلومها علي كل حاجة ومنها إن التيشرت بتاعك مكانش نضيف لما إحتاجته. مراتك ممكن تكون واحدة منهم لو إنت بأنانية بتسعي إنك تخليها صورة من مامتك. (أغلب الرجالة ميعرفوش الفرق بين دور اﻷم ودور الزوجة، عشان كدا بيكونوا ساذجين جدا وهما بيبدأوا أسرتهم الخاصة. بيبقوا عايزين أم تانية يعتمدوا عليها مش شريك يشاركوه حياتهم.) بنتك ممكن تكون واحدة منهم لو إنت بتمثل لها المثال الغلط وبتخليها تضحي باللي هي ممكن تكونه في سبيل اللي المجتمع عايزها تكونه.


تغيير الصورة دي ف إيدينا .. بدل ما نملا الواقع بتاعنا بهؤلاء الزوجات البائسات خلونا نقدملهم حاجة مختلفة. خلونا نعلم البنات تحب نفسها ويعرفوا إمكانياتهم الحقيقية. خلونا نبني ثقتهم ف نفسهم ونشجعهم يحققوا أهدافهم. خلونا نعلمهم إذاي يكونوا مواطنات صالحات عشان يشاركوا ف تطوير بلدهم. خلونا نتكلم مع كل البنات اللي نعرفها عن قيمة العمل وإذاي بيأمن مستقبل أفضل ليهم كأفراد وكمان كأعضاء ف اﻷسرة. بلاش نتساهل مع أي بنت بتتخاذل وخلونا نحسسها إنها بتهرب من مسؤلياتها. بلاش نسيب اللي منيمين مغناطيسيا يعيشوا ف العالم الخيالي بتاعهم خلونا نلهمهم عشان يعيشوا حياة كاملة بجد. كل دا بيبدأ بيكوا .. دلوقتي.


23 comments:

Unknown said...

أمك ماعرفتش تربيك
شوفي تربيتك يا هانم
الاكل بارد ليه امال انتي بتعملي ايه

دي جمل بنسمعها كتير في البيوت المصريه و العربيه المسؤليه كلها علي الأم
هي الي تربي و تأكل و تلبس و تذاكر و تسهر لما الولد يتعب و كمان تفسح

و الأب ضيف شرف في البيت
يتفرج علي نظافة البيت و أدب و شطارة الولاد و يدفع فلوس و بس

و لو الست فكرت في نفسها شويه يبقي كارثه تبقي ست انانيه و ماتستحقش تكون ام و كلام كتير كده

لازم بعض الضغوط دي م النظره العجيبه ليها تتنازل عن احلامها و طموحها علشان ترضي الناس

ايه كل ده انا رغايه اوي معاش

بوست جميل كالعاده يا فانتازيا

Coca said...

اظاهر اني مستقصده ايمي وبعلق بعديها في كل حته
بصي يا يا جميل اانا ليا وجهه نظر في الموضوع دا
الامومه بالنسبالي حاجه جميله اوي وشئ ممتع واهم وظيفه علي الطلاق انك تربي
بسسسسسس ستوب
مفهوم التربيه الي عنددنا بقي دا اللي يكره اي بنت في الدنيا انها تبقي ام بمعني الكلمه
لولا اهميه الامومه بكل ما فيها من تفاصيل وشقاء هذه المهمه ما كانت الجنه تحت اقدام الامهات
بس محتاجه الشق التاني من الحياه وهو اختيار الزوج اللي بيقدر دا
ولو الزوجه هتشتغل علشان يبقي ليها وضعها وعلشان تفيد غيرها هنا بيجي دور الراجل اللي لازم يقدر دا كويس
الحكايه عايزه تفتح من البنات في اختيار الزوج ومراعاه من الزوج وتقدي لهذه المهمه الرائعه والشاقه الامومه
رغيت كتير بقي معلش

goodman said...

رائع هذا البوست ويلخص اشياء كثيرة
مع خالص تحياتى

Fantasia said...

emy,
ashkorek 3al ta3lee2 elra2e3. kalamek sa7ee7 100% whowa da tamam elli kont 3ayzah 2a2oloh. elset fi mogtama3na morhaqah geddan wfahma ma3na eltad7yah 3'alat. falnateegah en el2osrah mesh btastafeed mn tad7yatha di wdayman btetlam wmesh 3agba 7ad. zolm fazee3 wya reet 7ad byestafeed.
ya reet tekteby 2ad mte2dary. 2ooly kol elli fi nefsek elblog dah 3alashana kolena ne3abar 3an elli gowana. ya reet tnawareeny dayman. shokran ltashgee3ek.

Fantasia said...

coca,
3andek 7a2. el2omoma tad7yah, bas mesh en elwa7da teda7y bnafsaha. da ente7ar mesh tad7ayah. wba3deen law hya mesh sa3eeda, 3omraha mhate2dar tes3ed elli 7awaleeha.
ana ma3aky en e7'tyar elzoog mohem geddan. laken lel2asaf mo3zam elgawazat taqleedya wmafeehash ma3refa sa7. elbanat mo3zamha bte3raf elli etgawezeto ba3d mykoon elgawaz tam fe3lan. wdi moshkella kebeera.
elzog elkowyess mesh bas elli ye2adar ta3ab mratoh, laken elli yesahem ma3aha felmas2olya, wye7es en elbeet dah mesh bas melkoh, laken elmakan elli by3eesh feeh. w2en elwelad dol besh bas shayleen esmoh, laken dol thamaret 7ayatoh elli lazem yera3eeha.

Fantasia said...

goodman,
ahlan beek. sa3eeda geddan en elpost 7az 3ala e3gabak. shokran 3la tashgee3ak. ya reet tnawarna dayman.

Anonymous said...

أنتى لخصتى حال الستات المصريات المذرى‘ دورى على واحده سعيده فى حياتها ولا شعرت أن تضحياتها أتت ثمارها ولا حتى أتحس بيها !! أنا لسه مقابله واحده صحبتى خريحة طب وقالتلى فى مراره أنها حاليا بتشتغل خادمه فلبينيه !!! وعلى فكره معظم الستات ده شعورهم(خادمات بون أجر9 ويا ريت عاجب! وما تقولوليش أمومه ! الأم ممكن يكون تأثيرها أفضل للو أعطت أولادها ساعه واحده فى اليوم بس تكون راضيه عن نفسها وعن حياتها . لكن العبيد لايربون الا عبيد!

Fantasia said...

anonymous,
ahlan beeky. kan nesfy te7'tary esm a3rafek beeh, laken elmohem elmadmoon. ashkorek geddan 3alta3lee2. kalamek felsameem. fe3lan el3abeed myraboosh ella el3abeed. e7sas el2om belsa3ada welreddah elda7'ely howa elli byen3ekess 3ala osloob tarbyetha l2awladha. faqed elshee2 la yo3teeh.
ya reet tnwareena dayman.

اسامة يس said...

رائع الوصف رائع الموضوع ... رائع كل ما فيه من دقة وتحليل دقيق للواقع ... لم تتركي قيد انمله الا كتبتيه....
لكن موضوع انهم متفوقات دا اشك فيه مش لانهم بنات لا ولا بنين دا تعليم فاشل حفظ للجميع يعني ممكن اوي يكون الاخير بيفرك احسن من الاول متستغربيش واكيد مش هتستغربي لان اللي بتحلل بالطريقة دي هتعي قصدي من التعليم البائس .. دي نقطة فرعية مش في صلب الموضوع
موضوع يستحق الاشادة
دمت بكل ود
خالص تحياتي

Unknown said...

لأا تعليق
انتى قلتى كل حاجه ممكن تتقال

البنات ضهية مجتمع شايف ان الجواز هو الاهم للبنت من اى شئ اخر حتى لو كان منها هيه شخصياً

تحياتى يا صديقتى العزيزه

Fantasia said...

osama,
ashkorak 3ala tashgee3ak. ya reet akoon fe3lan 2dert atkalem 3an kol gawaneb elmawdoo3, laken el7ekayah lessa taweelah.
ana motafeqa ma3ak fi mawdoo3 elta3leem dah. ana 7ata 2shart 2leeh felmawdoo3. elta3leem fi masr sabab mashakel keteer mn da3f elthaqafah lelbatalah l7agat keteer.
ya reet tnawarny dayman.

Fantasia said...

whyme,
shokran geddan ltashreefak elmodawanah wta3lee2ak elgameel. elbanat fe3lan da7eyah lmogtama3 motagamed wgahel. mesh momken hye7sal tatawor tol m7al nos elmasryeen keddah.
sa7ee7 elmodawanah di btetkalem 3an mashakel elmar2ah, laken hya felwaqe3 bte3kess moshkelet balad kamlah.
ashkorak 3ala tashgee3ak.
t7yaty.

Anonymous said...

انا معاك فى الى انت بتقوليية
بس انا ليا تعليق صغير
حال المراة المصرية الى بتتكلمى عليية دة مرتبط بالطبقة السفلى والوسطى من المجتمع
انما الطبقة العليا لا
انا شايف الموضوع لية بعدين ثقافى ومادى
يعنى ثقافة الطبقة المتوسطة كدة ومشهتتغير بين يوم وليلة
ثانيا الجانب المادى يعنى لو عيلة مثلا دخلها مرتفع جدا اكيد بكل سهولة الام لا هتغسل ولا هاتطبخ وهايكون عنهم خدامة وسفرجى وهكذا والام تقضيها تليفونات ونادى وكروشية وحفلات سيدات ودة موجود فى مصر بس نسبة قليلة

Fantasia said...

hartaka,
ahlan beek w2ashkorak 3al ta3lee2.
elmoshkellah mesh fel tabee7' wel3'aseel. elmoshkellah fi 3amalyet ta2seem el2adwar elli 3amelha elmogtama3 wfaredha 3al mar2ah.
tab3an kol qa3dah lyha estesna2. ana btkalem 3an el2a3'labyah btabee3et el7al.
t7yaty leek, wya reet tnawarna dayman.

شهرزاد said...

العزيزه فانتازيا زىماقولتى بالضبط لازم ناخد بايد المتخاذلات اللى اكتفت بالبيت
وسابت مسئوليتها كعضو فاعل فى المجتمع بس هى كمان لازم تكون عايزه تساعد نفسها
سعدت بوجودى فى المدونه الهايله دى تحياتى

ملك الكبدة said...

شوفي المشكلة موش في العلم ولا في البنت
المشكلة من وجهة نظري هي اختلاف رؤية المجتمع بين الحين والآخر تبعا للثقافة السائدة
بمعني في وقت مازالت اثاره باقية لغاية دلوقتي بيقول ان المرأة درة مكنونة لا يجب بأي حال من الأحوال تحميلها بأ]ة أعباء ومن ضمنها العمل
و هناك اتجاه آخر يقول بأن المرأة لا تختلف شيئا عن الرجل و بالتالي فإن عملها ضرورة
بين الاتجاهين تقف المرأة ككائن كسير الجناح و هي اصلا عنصر يستجيب لاضعاف المجتمع له و اضطهاده و من وجهة نظري ان الحل بيد من بيده الامر الا و هي المرأة المصرية

آسف جدا للإطالة و البوست عجبني جدا و للاسف لم يسعفني الوقت لتصفح باقي المدونة ا لاانني اعدك بذلك قريبا جدا
و اتمنى تشرف /تشرفي مدونتي المتواضعة
ملك الكبدة

ابو احمد said...

طب مانسال نفس السؤال بالنسبه للاوائل من الذكور هتلاقى الوضع لايختلف كثيرا الوضع والازمه المجتمعيه صدقينى تطحن الكل طبقات بالكامل تطحن
ماساه يافنتازيا
لى سؤال رخم شويه انت مبتكتبش التعليقات بالعربى امال فيه بوست عربى ازاى مش انحياز للعربى ولا شوفينيه
ده مجرد سؤال

Fantasia said...

malek elkebdah,
ahlan beek. ashkorak 3al kalam elgameel. ana motafeqah ma3ak tab3an en elmawdoo3 fi eed elmar2ah elmasryah nafsaha. laken kaman elmogtama3 lazem y7areb elgmood elfkry elsa2ed, elli byshaweh mo7awalat keteer lelta3'yeer, wby7ot ay wa7da t7awel tetaleb b7oretha fi mawqef sa3b.
shokran geddan 3ala da3wetak lelzyarah. ya reet tsharfna dayman.

Fantasia said...

shahrzad,
ahlan wsahlan beeki. ana mo3gaba geddan bmodawentek, fe3lan hayla. atmna leeki kol eltawfee2.
sa3eeda awi bta3lee2ek. ya reet kol bent te3raf enha leeha dor felmogtama3 w2enha lazem tdafe3 3an 7oryetha.
shokran ltashreefek lya, ya reet tzoreeny dayman.

Fantasia said...

abu a7mad,
wallahi ashok en 80% mn el2awa2el elzokoor by2o3odo felbeet ba3d elta7'orog. ya3ni elbatalah mesh awi keddah :)
3andak 7a2 fi so2alak tab3an. elmodawanah di hya targamah 3arabyah lmodawenty el2aslyah bello3'ah el2engleezyah. http://fantasia4ever.blogspot.com
feeh zameel 3azeez tatawa3 mashkoor tab3an enoh y2oom beltargamah ba3d ma ta7amas lketabaty. wana madeena leeh belshokr, l2n lawla maghoodoh makontesh 3ereft atawasal ma3a nas gameela zayokom.
akeed qera2et kalamy b7roof english sa3b. ana asfa geddan, laken di eltaree2ah elwa7eedah elli 2a2dar akteb 3araby beeha. shokran ltashreefak lya.

ابو احمد said...

كل سنه وانت طيبه

Fantasia said...

Abu A7mad,
Kol sana wenta tayeb. 3eed sa3eed :)

Coca said...

http://kolo-mashy.blogspot.com/
بصي علي الميل بتاعك وادخلي شوفي اخر بوست
عندنا علشان معاد د اياد حرفوش